趁墟葵芳

你或許不知，「葵芳」並非一個正式的區域地名，香港地圖一般都沒有「葵芳」這地名，政府中較準確地名為「醉酒灣」或「下葵涌」。「葵芳」一名本來是由「葵芳邨」衍生而來。這裡的歷史始於1960年代末的填海工程，源自醉酒灣（俗稱垃圾灣）的改造。港府為發展荃灣衛星城市及工業，在此興建廉租屋邨，「葵芳」以「芬芳吐艷」意象命名自葵芳邨。區內發展與1970年代落成的葵涌貨櫃碼頭息息相關，早期居民多為工廠從業員，現已發展為完善的住宅與交通樞紐。

老友追稿，叫我寫一下「葵芳」，擺明係趁夜王墟，覺得我住得近，實有嘢可以寫。

但寫葵興容易，因為接駁巴士M線，經葵興唔經葵芳。葵興亦係我「龍興之地」，嗰陣同生意夥伴，一人一包檸檬茶，喺邨入面嘅長椅，蘊釀創業小計。

葵芳，分階段寫啦。

小學：葵芳最威威，係電影《恭喜發財》結尾，喺「好爵皇宮」大門外結局，左右兩頭大馬相當搶眼。我哋成家成日去飲茶，覺得與有榮焉。另外，聖公會葵涌四小龍，主恩、主愛、仁立、思晃，成日去溫故知新，思晃最弱。葵芳重建，連名都改埋。

係呀，葵芳因為啲鹹魚樓，殘破咗好耐，所以少去，冇乜記憶。

中學：更加少去，因為我跨區讀書。有幾年陸運會喺葵芳搞。葵盛有泳池，有壁球場，唔使去葵芳。去踢波？聽聞收陀地好嚴重，都係唔好周圍走。

就業：第一份工係喺葵芳打，近年捧到上天嘅葵廣，當年漫畫店林立。另外入面有條掘頭小巷，有漫畫，亦有二手音響，有人練Karaoke，好難聽。之後工作轉咗區，再冇回憶。

獨身：2005年，雙親都走咗。要煩惱食飯問題。有唔少日子，從盛西行到葵廣，嗰邊有啲茶餐廳，記得12蚊一兜例湯，嗰陣時算貴，但足料，都會科水幫襯。好店不長，唔知因為租約定乜嘢原因，執咗。換成草根飯堂，估唔到撐到今日。

之後，搬出葵盛，同葵芳緣盡。

葵芳趁墟一文，平淡無味。

我本不是弄潮兒，完。

參考：香港地方大典│葵芳

文/ 拾謊者

* 本文觀點僅代表作者個人意見，不代表本頻道立場。 本頻道不對文章內容的準確性或適用性承擔責任。